Дома Македонија Институциите не потврдуваат дали началникот на СВР Штип е дел од криумчарите на мигранти
Македонија - февруари 16, 2019

Институциите не потврдуваат дали началникот на СВР Штип е дел од криумчарите на мигранти

Мининистерството за внатрешни работа, а потоа и Јавното обвинителство за гонење на организиран криминал соопштија дека во 21-члената група која криумчарела мигранти е полициски службеник, кој бил информант за поставеноста на полициските патроли. Некои од медиумите објавија дека станува збор за началникот на СВР Штип, меѓутоа, денеска кога побараме потврда, од страна на портпаролката Гордана Панајотова одговори дека не може да каже ништо повеќе од тоа што е објавено и дека предметот е надлежност на Јавното обвинителство.

Како што дознаваме, полицискиот службеник не е во листата од 11 луѓе за кои е побаран притвор.  Судија на претходна постапка им одреди притвор на 11  членови на криминална група инволвирана во криумчарење мигранти, а на останатите лица им е одредена мерка на претпазливост, соопшти МВР.

Во групата која била структурирана, се наоѓаат и неколку жители на Општината Карбинци, каде во четвртокот вечерта и во текот на ноќта се пребарувале куќи, помошни простории, возила, штали. Како што дознаваме, членови на групата усепале да побегнат пред почетокот на акцијата.

МВР соопшти дека Националната единица за сузбивање на криумчарење мигранти и трговија со луѓе, во Сектор за криминалистички истраги, при Одделот за сузбивање на организиран и сериозен криминал, во содејство со Одделот за специјални и посебни операции и Регионалните центри за гранични работи „Исток” и „Југ”, во координација со ОЈО за ГОКК, вчера спроведе координирана полициска операција со цел расчистување на кривични дела кои се однесуваат на организирање на група за вршење на кривични дела криумчарење мигранти кои преку грчко-македонската граница, остваруваат нелегален влез на територија низ Република Северна Македонија, по што од членовите на криминалната група се прифаќаат и превезуваат до Кумановско-липковскиот регион.

Како што соопшти МВР, криминалистичката истрага над организираната 20-члена криминална група со дефинирана структура и строга хиерархиска поставеност се спроведувала од мај 2018 година, како и над еден полициски службеник кој ја помагал криминалната активност на групата.

-ОСОСК до ОЈО за ГОКК, поднесе кривична пријава против вкупно 21 лице, и тоа: Ќ.Н.(32), Ќ.М.(29), И.А.(38), С.М.(31), А.А.(33), Е.Г.(31), М.И.(47), У.М.(33), Ш.Е.(26) М.М.(27), Ј.Д.(42), Е.С. (30), M.E. (23), Е.О. (23), Е.Н.(28), А.М. (29), Џ.Б.(23), И.Р.(27), Љ.М.(42), Х.А.(48) и Љ.Т.(58) поради основано сомнение за сторени кривични дела „Организирање на група и поттикнување на извршување на делата трговија со луѓе, трговија со дете и криумчарење на мигранти” по член 418-в, „криумчарење на мигранти” по член 418-б од КЗ на Р.Македонија и за „помагање” во врска со истото кривично дело, се наведува во соопштението од МВР.

Лицата Ќ.Н., Ќ.М. и И.А. заедно со организаторите задолжени за прифаќање и превезување на илегалните мигранти С.М. и А.А., со умисла и од користољубие, а со цел стекнување на противправна имотна и материјална корист, организирале криминална група во Република Македонија, која од средината на 2018 година досега, организирале криумчарење на лица илегални мигранти кои на територијата на Република Северна Македонија биле пренесувани илегално од Грција преку т.н. „зелена граница” во околината на Дојран и Гевгелија.

Оттаму, како што велат од МВР, со помош на водичи мигрантите биле носени на претходно договорени локации, од каде се вршело нивно прифаќање од страна на лицата членови на групата со товарни и со патнички моторни возила. Илегалните мигранти биле превезувани до Кумановско-липковскиот регион, односно во селата Ваксинце и Лојане, каде биле времено сместувани и засолнувани во објекти на соработниците на криминалната група, а потоа криумчарени преку македонско-српската граница. Најголем број од лицата илегални мигранти кои биле криумчарени од страна на групата биле по потекло од Aвганистан, Пакистан, Ирак, Бангладеш и други земји од Блискиот и Далечниот Исток, кои претходно престојувале на територијата на Грција.

Организираната криминална група, при реализирање на криумчарењето на илегалните мигранти, користела и повеќе други лица во својство на помагачи и соработници на криминалната група. Лицето С.М. остварувало контакти и средби со полициски службеник, со цел добивање на известувања за поставеноста на полициски патроли, контроли или заседи, како и информации за тоа дали криминалната група е предмет на истрага во МВР и насоки како да го прикријат нивното криминално делување.

Во соопштението од МВР е наведено дека се извршени претреси во 20 објекти во Скопје, Штип, Радовиш и Струмица, по што лишени од слобода беа вкупно 16 лица, а еден е на издржување на казна затвор за сторено кривично дело по член 418-д. При претресите пронајдени и привремено одземени се 12 патнички моторни возила, 46 мобилни телефонски апарати, 36 сим картички, 17 држачи за сим картички, бела прашкаста материја, марихуана, пиштол кал.9 мм, воздушна пушка кал.4,5 мм ЦЗ, 112 куршуми, 5770 евра, 197.000 денари, 105 американски долари, 100 швајцарски франци во различни апоени, нотеси со телефони и податоци за лица, документи за патување во Грција и други документи.

-Пријавените се изведени пред судија на претходна постапка, од чија страна е одредена мерка притвор на 11 од кривичнопријавените лица и тоа на Ќ.Н., Ќ.М., И.А., Е.Г., Х.А., Е.Н., Љ.М., А.М., Ш.Е.,М.Е. и Е.О.. На останатите им е одредена мерка на претпазливост, се наведува во соопштението од МВР.

Напишете коментар

Вашата адреса за е-пошта нема да биде објавена. Задолжителните полиња се означени со *

Слични написи

Ексклузивно интервју со Метју Нимиц: „Името е ново, но државата и нацијата се непроменети-македонски!“

Автор: Слободан Томиќ Кои се последиците од промената на името на државата Македонија во д…